Unser Sujet
«Demonschtriere statt intrigiere»
Unser Rädäbäng
Geege alles ka me brülle;
mit Mensche wänn mir d Stroosse fülle
Mir mobilisiere d Masse;
und bioggiere alli Gasse
D Raere, die hänn mächtig Dampf;
mir stirze uns in Klassekampf
S Proletariat stoot uff, hurra;
s Estäblischmänt kunnt jetzt draa
Bisch nit z friede due di weere;
sunscht kasch d Entwigglig nimme keere
Faane schwängge, Schmiereriere, isch das nötig?
S Dram het als verspötig
Witt mit em Schatz fein go flaniere;
muesch di mit em Pöbel arrangiere
Gendergrächt, das muess es sy;
das goot uns voll am A…llewyl verbyy
Dr CO2-Ghalt stygt und stygt;
mit däre Wält hänn mirs vergygt
Mir pfläge allewyl dr Umwält-Faggdoor;
bald haissts Ross statt Draggdoor
«Monday for Fasnacht» haisst d Devise;
sunscht griege mir e Gryyse
Bisch passiv, machsch kei Aggzioon;
fyylsch di langsam wien e Gloon
Comité Sujet
«Zämme im Taggt»
Dr Blaggedde Värs vom Fasnachts-Comité
Zämme im Taggt
Äntlig, äntlig, äntlig, äntlig
Gits – und dasch nid sälbverständlig
Wiider Fasnacht mit Emozioone
Jä und ganz ohni Reschtriggzioone
Vor allem wiider – dasch e Sääge
Mit de Chaise mit de Wääge
Alli zämme das duet zelle
Mit Piccolo und mit Tschinelle
Mit Mimösli und schliesslig dängg
Zooben au mit Schnitzelbängg
S driffts s Motto dorum au exaggt
Fir unsri Zyt «Zämme im Taggt»
S goht äntlig nimme um Symptom
Dr Taggt a git e Metronom
Symbolisch hebts do e Major
Uff dr Blaggedde vo däm Joor
Schliesslig machts denn no dr Aaschyyn
Dass Ueli Waggis Harlekin
Do fascht nimme kenne warte
Bis si am Vieri deerfe starte
Fir sone Wurf bruuchts en Idee
Jä gha het se dr Désiré
Felix Meyer doch firs Moole
Isch är dr Hampé denn go hoole
Wo si Handwärgg wohl verstoht
Und dorum ganz gnau waiss wies goht
Präggt het si und dasch dr Knüller
Wie allewyl unsre Mike Müller
Es wird e feyni Fasnacht – wärdets gseh
Härzligscht s Fasnachts-Comité