Unser Sujet
«Kasch baue was de wotsch … Es git nid meh vom Comité!»
Unser Rädäbäng (syt 2026 nur no im «Basel City Guide» App)
Waagebau und Arbedsgraft, zem groosse Batze, hämmers nie gschafft
Subvenzioone mischteriees, es isch eso, mir sinn nit bees
Konschtruiere in Zersteerig, kai Neiuffbau, das gfallt is gheerig
Vorschlaghammer, Farb verschmiire, statt Glääbe, Moole, kaschiere
Abriss hämmer zelebriert, kai Neiuffbau iniziiert
Subvenzioone sinn wichtig, leend is Fasnacht fyyre richtig
Wärde wyter intrigiere, die Liebi losst sich nit negiere
Mit Gligg wird s Comité das gsee, wär waiss, velicht git s jo mee
Im App die Erklärung (au no) auf Deutsch:
Trotz mehr oder weniger Aufwand bzw. Investition bei Bau/Gestaltung
des Wagens, bleibt die Höhe der Subventionen plus/minus jedes Jahr
dieselbe. Dies soll mittels einer «Bauruine» dargelegt werden.
Unser Väärs
D’Raere, voller Freud in d’Saison gschtartet.
Doch alsbald isch’s gwiss e Weneli ussgartet.
Uff Subventione gwartet mit Zueversicht fyr e ordentlige Batze.
Doch nach em Erhalt, hän mir nur no zooge e langi Fratze.
Verganges Johr, e Kirche – mit Turm – uff d’Route gnoh.
Mit em Ziel, de Bsuecher fliessig Ihri Sünde z’erloh.
Däm Kirchebau, Arbeitskraft, mängi Stunde gschänggt.
Doch fyr de grossi Batze vom Comité het’s nid glängt.
Trotz Uffwand fyr das Seeleheil, de git’s zem Schluss.
Noch Erhalt vor Comité Boscht denn nur Verdruss.
Hauptgschicht – Dr Abbau
Dr Waagebau, viel Schweiss, Bluet und Arbedsgraft
Doch zum grosse Batze, hän mir’s bis hüt nie gschafft.
D’Subventione, gheimisvoll und mischteriöös.
Es isch eso,mir sin nid böös.
Mir konschtruiere in’d Zersteerig.
Kai Neuuffbau, das gfallt uns g’heerig.
Syteschnyyder, Vorschlaghammer, Wänd zerlege, Farb verschmiere
Statt Kläbe, Moole, schön kaschiere.E Bauruine hän mir gschaffe.
Jetzt stöhn mir do, mir blöde Affe.
Dr Abryss hän mir zelebriert, Kai Neuuffbau initiiert.
Doch Subventione sin uns wichtig. Löhnd uns Fasnacht fyyre richtig.
Mir wärde wyter intrigiere. Die Liebi loht sich nid negiere.
Mit kly Glygg, wird s’Comité das gseh.
Und wär weiss, eventuell gits im 2026 meh.
Und, sin mir au e Trümmerhuffe, Im Fasnachtstraum mir wänd versuffe.
D Asprooch vo dr Waage-Gotte Michelle an dr Dauffi
Ich säg Merci – es isch mir e Ehr, das Johr euri Waage Gotte z’si.
Mer gseht: s’Budget isch eher knapp – es het grad no für e Aargauerin längt, statt für e waschechti Baslerin. S’Grücht uf dr Gass schiint z’stimme: d’Subventione si letschts Johr wohl chli mager usgfalle. Und das Johr? Es längt fasch nümme: kei rächts Koschtüm, vo de Brocki, defür d’Larve vom Hans, e abgratzte Waage – aber Hauptsach es Pissoir. Das het mir s’Fasnachtsherz schwer gmacht, drum hani e Spendeaktion gstartet. S’Comité weiss au drvo – und drum si zwei Vertreterinne do, zum ganz offiziell d’Spende in euri Händ z’übergäh. E schöni Fasnacht zämme!
Comité Sujet
«Blyyb verspiilt»
Dr Blaggedde Värs vom Fasnachts-Comité
Botzdonner, hoppla, also guet
Do het jetz öbber aber Muet
Eso aini – herrjeeminee
Het Basel glaub no gar nie gsee
Schlicht und klar wies aim grad dunggt
Bringt si dr Kärn grad uff dr Punggt
Es goot um d Zuekunft – um die Glaine
Jä s Comité mecht dorum maine
Me soll jetz mol die Junge eere
Und d Blaggedde soll iine gheere
Mit iine sinn au die verbunde
Wo jäärlig als zig-dausig Stunde
Sich fir dr Noowuggs fescht yysetze
Me ka das gar nit gnueg hoch schetze.
Dä Binggis doo symbolisiert
Dr Noowuggs und transportiert
Die Lyychtigkait und au die Fraid
Dr Witz und schliesslig d Haiterkait
Wies nur bi Kinder so ka gää
Mir kenne si als Vorbild nää.
Bim Kinschtler, wo sich Orlando nennt
Isch s innre Kind au duurebrennt
Won är d Blaggedde het kreiert
Und mit däm Binggis raffiniert
Dr Uffruef an ys alli macht
Gännt Vollgas, und zwor dass es gracht
Dient lache, spiilen, ummerenne
Wies aigentlig nur Kinder kenne
Hauets uff d Gass und löönt ain uuse
Kasch s Joor duure no gnueg lang pfuuse
S het numme d Fasnacht die Magie
Drum löönt ys alli Kinder sy
Blyyb verspiilt als glaine Gnopf
Das drifft dr Nagel uff dr Kopf.
Vyyl Spass iir Kinder, juhui juhee
Winscht sFasnachts-Comité