Unser Sujet
«Mir spiile grad kai Sujet us, neitraal derbyy isch unsere Gnuss»
Unser Rädäbäng
Jeede will e Mainig ha, doch uns goot das alles ganz und gar nyt aa,
denn mit blieterwysser Weschte, wänn mir fir alli numme s Beschte.
Dy Aasicht, die isch uns egaal, denn mir sin jetz neitraal.
Comité Sujet
«bis zletscht»
Dr Blaggedde Värs vom Fasnachts-Comité
Vier Sekunde fääle numme.
Zwaiesiibzig Stund sinn umme.
S kunnt dä Ändstraich immer schnäller
und dy Stimmig keit in Käller.
Halt, d Frau Fasnacht sait is hit:
Zerscht machsch du bis zletscht no mit,
denn es wär e bitzli waich
Ändstraich vor em Morgestraich.
Ändstraich isch do au symboolisch,
wells dr muba nimme wool isch.
Ändstraich duet fir si bedyyte:
Jetz kaasch s Dootegleggli lyyte.
D Uur lauft no bis zletzsch ganz guet.
Kain me ziet dr Hermes-Huet.
Vor me dää an Naagel hänggt,
hets em no zum Sujet glänggt.
Bi dr Mäss frogsch di ganz blaich:
Isch das jetz dr letschti Straich?
Kaaschs am Donnschtig ächt verstegge?
Du bisch zinftig uff de Wegge.
No bis zletscht steen alli yy
und e letschte Marsch mues syy.
Rund um d Lampe wird no pfiffe.
S Drummle deent nimm ganz so gschliffe.
Wottsch s letscht Lampevärsli lääse,
gseesch du pletzlig schon e Bääse.
D Ändstraich-Stimmig isch bitz doof.
Jetz bruuchsch du e gsunde Schloof.
No ganz wach und ganz e zwääge
isch dr Müller als bim Prääge.
Und dr Tarek Moussalli lacht.
Är het nämlig d Erfindig gmacht.
Mit Blaggedde, saag i alle,
wird dr Ändstraich lychter falle.