Unser Sujet
Es git im 2020 kei Fasnacht.
Dorum hän mir kei Sujet und es git keini Hèlge!
Comité Sujet
«Heb di fescht»
Dr Blaggedde Värs vom Fasnachts-Comité
D Fasnacht bruucht e kai Kontrolle.
Heb di fescht, si kunnt jetz z rolle.
Fünf Fasnächtler uff däm Trotti
wisse, dass me daas nit sotti.
Aagää mien die fünf do nit,
denn es faart eleggtrisch hit.
Und esoo gseesch du die Naare
in d Fuessgängerzoone faare.
Grad d Frau Fasnacht duets gärn gsee.
Si darf halt e bitzli mee
und si sait, jetz hauet druff,
machet d Waggisschnuuren uff.
Nämet alli draa mit Witz
aber au e bitzli spitz.
Am Majoor gfallt daas enorm.
Stolz gseesch dää mit Uniform.
Soone Waggis ruesst ganz scheen
und dr Harlekin pfyfft Deen.
S duet e Kind dur d Larve gnaisse
und e Hampfle Räppli schmaisse.
Zvoorderscht styrt dr Gloon e bitz
und si keie nit uf d Schnitz.
Mit vyl Muet geen sii ans Wäärg,
heb di fescht, am Spaalebäärg.
Soo vyl Schwung kaasch nur dert hoole.
Noochemache nit empfoole.
D Fasnacht gseesch du soo komplett
uff däm glaine Trottinett.
Wäär isch soone Faarzyghalter?
Daas isch wider dää Kurt Walter.
Sy Entwurf goot gly zum Müller
und d Blaggedde wird e Knüller.
Heb di fescht und heb si fescht,
denn am Revers isch si s Bescht.