Unser Sujet
Es git im 2021 kei Fasnacht.
Dorum hän mir kei Sujet und es git keini Hèlge!
Do aber no e Värs vom Urheeber Gilbert H.:
Es isch e truurigs Spiil
Doch mir Raere Waggis, nämes mit Styyl
Ich weiss bald nym syt wen ich derbi bi, bi de Raere
Aber sicher bin i, as si bald syt drei Joor nit duet raere, unseri Raere
Mir fäält d’r Ramba Zamba uf em Wage uns d Räppli umeschmeisse,
Und mit Euch durch d Gasse umezieh, es isch eifach schei…
s› Schnitzelbangg Comité fyrt si Jubiläum zum hunderschte Joor
Und das ohni Fasnacht, es isch halt leider truurig, aber woor.
Deshalb do e paar usgwäälti Zeedel us dr Vergangeheit zum Läse
As De in Diine vier Wänd nit ganz duesch verjässe
As Du und Diini Lyt könnet e bitz Lache und Sinniere
Und über Ereignis us dr Vergangeheit Parliere
Unseri Raere Waggis Familie het e tolle Zämehalt
Dorum bliebt d’r Brogle au bis zur nägschte Fasnacht, aktiv halt
So jetzt wünsch ich Euch Raere viel Geduld dehaime
Und loo Euch jetzt vo d’r nägschte Fasnacht draime.
Comité Sujet
«Ainewäg»
Dr Blaggedde Värs vom Fasnachts-Comité
Dääglig rysst me d Blettli ab.
Mänggmool wärde d Rolle knapp.
Doodrvoor hänn d Schwyzer gwiss
hitte no am maischte Schiss.
Ainewäg sottsch d Rolle eere,
well si jetz ans Revers gheere.
Duesch du uff em Haafe sitze,
dien d Gedangge dureblitze.
S Blettli ains macht dir e Gschängg.
100 Joor heersch d Schnitzelbängg.
Jetz mit Masgge, s isch zum briele.
Due dr Mäntig aabespiele.
Mit Drumpeete trifft dr Gloon
uff em Blettli zwai dr Doon.
D Drummle wott er au no schrängge,
kaasch dr Zyschtig aabeschwängge.
Und die Alti Dante doo
bloost ganz fescht ins Piccoloo.
S Blettli ryssisch ab scho gly
und dr Mittwuch isch verby.
Nuur d Frau Fasnacht sait is trogge:
Uff em Droon blyb ych jetz hogge.
Pascal Kottmann, mit dr Rolle
schepfsch du wirgglig uus em Volle.
Uus Bapyr wär die kai Sääge,
drum duet si dr Müller prääge.
Nit vyl goot in däne Dääg.
D Rolle kauft me ainaiwäg,
denn d Bapyrform wirds no gää.
Die us Gold muesch jetze nää.