Unser Sujet / Infos zum Ablauf 2022
Es git das Joor ändlig e Fasnacht, aber nit für d Wääge!
Dorum hän mir kei Sujet und es git au keini Hèlge!
Aber mir sin mit unsere Schwaissbropäller uf dr Route unterwägs!
Mir träffe uns am Määntig und Mittwuch am eins am Midaag bim Staartpunggt. Mir wän e Halt mache, wo mir au mit em Waage e Phäuseli mache. Do nit glaar isch, wievyyl in dr Stadt loos isch, sin diesmol die Agoobe sehr ungnau! Aber es wurd uns freue, wenn mir Euch neume wurde aadräffe! Am Zyschtig sin mir mit de Binggis ganz «normal» unterwägs!
Um no d Froog do unde vom Comité scho z’beantworte, ob’s uns no basst? Naai, gar nit, do mir mit unserem Waage nit uf d Route deerfe!
Do aber no e Värs vom Urheeber Pirmin Muckenhirn:
«Bassts no» s Sujet zwaiezwanzig
het mir nid richtig gfalle welle.
E Tambourmajor, zimmlig ranzig,
was will dä uns verzelle?
Doch, je lenger ich due noochedängge,
iber s Sujet wird mir klar,
ich due däm Thema Gfalle schängge,
und finds pletzlig wunderbar.
Bassts no, ass mir Fasnacht mache?
Bassts no richtig freelig z syy?
Bassts no amel zämme lache?
Oder isch das jetz verbyy?
Bassts no as me yystoh duet
wenn s jo gar kai Cortege git?
Wird das jeemools wider guet?
Amel glaub i s wirggligg nid.
Denn wemme dänggt, und das isch wohr,
dä Virus und Krieg dien stimme,
wird au in de näggschte Joor
nyt me basse, das isch s Schlimme.
S Goschddyym lehn mir zwor nit hängge
egal ebs uns no basse will.
Denn truurig mien mir do dra dängge
Unseri Raere blyybt au wider still
Comité Sujet
«Bassts no?»
Dr Blaggedde Värs vom Fasnachts-Comité
Wenn du duesch ins Goschdym stoo,
gseesch du gly, ob daas duet goo.
S basst no, doch du merggsch, s isch knabb,
doorum nimmsch drei Kilo ab.
Also bisch du bald sowyt
noo dr glaine Faschtezyt.
Griiblig wird i jetze gly.
Daas mues s Fasnachtsfieber sy.
Zwai Joor Pause sinn seer schaad.
S letscht Joor wäär i scho baraad.
S Goschdym wäär denn ab dr Stange
au no ooni abznää gange.
Naie, fligge, mach di draa.
Leggsch dy Goschdym ändlig aa?
Bassts no, isch bim Goschdym d Froog,
drum stoosch duu halt zerscht uf d Woog.
Gold und Bijou dien di wääge.
Noohär kaasch dy Goschdym pflääge.
Wirsch du uff dr Woog ganz muff
und saisch: Ych stand nit deert druff.
No nimmsch d Kupfer, d Silber gly.
Hitte mues es buuchfrei sy.
Buuchfrei? – Loos, jetz dängg nit z vyl.
S basst am Revers allewyl.
S isch e Wurf vom guete Gstalter.
Aimool mee haisst äär Kurt Walter.
Und dr Müller präggt ganz gfrait
daas, wo iim dr Kinschtler sait.
Zur Blaggedde gits no z saage:
Die kaasch ooni abznää draage.