Unser Sujet
«Annus Sanctus!»
Unser Rädäbäng
Alli 25 Joor dien si jubiliere, deert in Rom
Uuus alle Richtige kunnt denn dr aint und ander Gnom
D sine wänn si erloo, s isch allerhand, mir sinn scho zimlig gspannt
E Wallfaart ino Rom, mir rolle duur dr hailigi Pforte im Petersdom
Wie allewyyl faare mir ooni Fraue, die mien denn halt uff Gott vertraue
S Zölibat … famos, mir wärdes pflääge und hoffe, s git dr neetig Sääge
Glaub d Raere wärde seriees, nämmed uns das jetz nit bees
Mir sin katholisch … römisch, was nit allwyyl schön isch
Aaber s isch jo nit fir immer, sunscht wird das eppe no schlimmer
Die Kirche duet sich oft blamiere, mir hälfte gärn, deert bim Saniere
D Raere fyyre dissjoor dr «Annus Sanctus»
Klar, erwarte mir vom Comité e grossziigig Obolus
Mir mien uns nit nei grinde in dr Hoffnig, d SInde dien verschwinde
Die drei scheenschte Dääg sinn unsri Frinde, mir erleen uns alli Sinde
Dr Värs vo dr Waage-Gotte an dr Dauffi
D’Waagegotte, Heiligi Barbara das bi ich!
d Raere Schutzpatronin für das Joor, i möchte euch alli härzlich begriesse
D’Kirche uff em Waage isch guet ersichtlich, darum e gratis Tipp,
nämmed besser keine glaine bube mit!
Brueder Baumeister Wiedemaa het plant, als ob är vor’s jüngste Gricht muess Stoh!
Aber zum Glück muess är friehschtens nach dr Fasncht go,
das het dr liebä Herr ihm Himmel ihm nach däre tolle Leischtig gloo!
mit Sääge, Freud und viel Tamtam, isch dä waage do gerboore,
d Enerige und für dMotivation händ Raere uff dr Kaffi vom Brueder Martin gschwoore.
Ganz fromm, wiäe anderi am Sunntig in Kirche gönn,
hän d Raere am Samschtig mit festem Glaube dä Waage erstellt.
Doch fromm bliebe wärde d Raere Brieder nid,
sobald dä Waage tauft isch, jo denn wird’s wild!
Nüt für d Kirche wird in de nägschte drei Dääg passiere,
das ka i euch mit Gottes sääge garantiere!
D’Fasnacht schreit, d’Glocke schalle,
und dir Raere lache, tanze und trinke die ganzi Nacht!
Raere Waggis, wild, versaut, frei an dr Fasnacht, so sötts au si!
Jetzt möcht i euch gar nid lang warte loh und säägne dä Waage do!
Mit Bier, Schnaps und Fasnachts-Fantasie!
Ufd ‚Waggentaufi stosset ah,
mir schreie luut, Heillige Raere Hurra!
Comité Sujet
«Syg wie de wottsch»
Dr Blaggedde Värs vom Fasnachts-Comité
Jä unsri ney Fasnachts-Blaggedde
Het ussergweenlig vyyl Facette
Dr Guido Happle het se disaint
Und die ganzi Fasnacht so veraint
E Harlekin und au e Pierrot
Jä au en Ueli gseht me do
Drzue kunnt no e Blätzlibajass
Und au e Waggis us em Elsass
Die Alti Dante ganz adrett
Macht so die Rundi no komplett
E Drummle und e Piccolo
Dien fir d Clique dodruff stoh
Mit sym Stägge git exaggt
Dr Major aa no scheen dr Taggt
Unter em Himmel mit de Stärne
Lyychtet häll e Stäggeladärne
Und schliesslig gsehsch no z letsch emänd
S het ebber Zeedel in de Händ
Dr Vortrab isch so au drbyy
S will jo kai Clique ohni syy
E Helge jä dä isch do dängg
Fir unsri gliebte Schnitzelbängg
E Zoggeli – und das isch klar
Isch jo e Waggis-Accessoire
Und so sin d Wääge unsri nätte
Beschtens jetz do au verdrätte
E Pauker paukt no binere Gugge
Und fillt so no die letschti Lugge
E jede freut sich ab em ander
E heerrlig Gwiehl e Duurenander
Wies numme an dr Fasnacht git
Und alli mache friidlig mit
Wo duets das denne sunscht no gää
Me darf ys gärn als Vorbild näh
Und jede so wien är grad will
Farbig, lutt und als au schrill
Eso verstoot jetz jede Dottsch
S Fasnachts-Motto «Syg wie de wottsch»
Das isch dr Kärn – das isch d Idee
Maint s Fasnachts-Comité