Unser Sujet
«Vor luuter Kultur isch alles verbotte!»
Unsere Sujet Värs
Basel, me schryybt d Kultur ganz gross
Und jede in dere Stadt findet’s famoos
Fuessball, Museum, Kunst und Konzärt
Das git unserer Stadt e hohe Stellewärt
Au Jazz- und Jugend-Kultur-Festival
Mässe, Tattoo und Baseler Karneval
Doch neume wo’s viel Agebot het an Kultur
Git’s sicher Yschränggige oder sogar Zensur
Denn nur e kli Lärme und tuet’s dätsche
Tuet dr Noochber sich beschwääre und lätsche
Bsoffeni joole und groole
Jungi dien Wänd vermoole
Uf dr Stroos tuet’s krache
Am Rhy dien sie luut lache
Überall wird graucht und gässe
Dr Läärm kasch in Dezibel mässe
Kei Füürwärk, kei Musig
Jede seit, das es z’lut sig
Dreiländeregg, wägem Läärm haglet’s Beschwäärde
Schwoobe und Waggis zeige böösi Gebäärde
Im Summer git’s e musikalischs Kulturflooss
Awohner saage, dr Läärm isch z’grooss
Au die vielfälltigi Basler Ässkultur
Git dere Stadt e bstimmti Signatur
Doch Wysswürscht und Bier hän bald usdiehnt
Mit Take-Away und Kepap wird mehr verdient
Königligi Börger, anstell Bruune Mutz Bierkultur
Gegeüber blibt s Casino, anstell irakischer Architektur
Denn Basler stimme ab, saage «nüt wird baut»
Aber für dr Fasstfood sich’s Volgg bald staut
Au d Natur macht nit immer mit, kei Rhyschwimme
Behörde mien’s verbiete und em Vater Rhy zuestimme
D Raere Waggis in trischter, grauer Kostüm-Montur
Gsehn in dere Stadt dr Verfall vo dr Kultur
Dangg neuem Dach stöhn mir im Schäärme
Aber höre näbscht dr Raere no viel andere Läärme
Dorum versueche mir mit Verbot d Lüüt z’längge
Mit Reegle ihres Lääbe e kli y z’schrängge
Und stööhn do 3 Daag ufem Waage
Mir nörgele ume und hän emol s Saage
Überall wän mir in dere Stadt plaane
Mit Schilder an mängs dra z’ermahne
Mir spräche sie us, no mehr Verbot
Denn die sin für uns wie e Gebot
Diend uns bitte wie de Politiker vertraue
Wänn mir doch no mehr Verbotsschilder verbaue
Aber vo luuter Zensur tuet me nüt meh gseh
Jetzt längts, jetzt wämmer nüme meh
Zwar sot mängs im Lääbe verbotte wärde
Doch git’s sicher wichtigers uf dr Ärde
Mir wänn jetzt d Fasnacht gniesse
Und nüm über s Zyyl useschiesse
Für uns isch’s nach drei Daag verbi
Mir lön d Kultur wieder ohni Verbot sii
Comité Sujet
«Mir spiile us!»
Dr Blaggeddevärs vom Fasnachts-Comité
Bi dr Blaggedde Null-Null-Acht verstoot me glyy,
was Faasnacht mache haisst bi uns dehaim am Ryy,
das haisst: doo wo dr Ryy sy groosse Booge macht,
wo jeedes Joor in dääre ganz spezielle Nacht,
wemme dr Vieri-Schlaag vom Martinsgleggli heert,
mer wider alles saage deerfe, won is steert.
Mir spiile us mit Goschdym, Helge, Bängg und Väärs
Mir spiile us dr Gsellschafts- und Polit-Kommäärs.
Mir spiile us und schiesse jetz us vollem Roor.
MIR SPIILE US haisst doorum s Motto in däm Joor.
D Blaggedde zaigen is e ganzes Kartespiil.
Und wäär e bitzli druuskunnt, merggt, dass bi däm Stiil
dr PASCAL KOTTMANN hinder dääne Kunschtwärgg stäggt.
Dr DÄNI MÜLLER het si, wie mer s gwoont sinn, präggt.
Mer wisse, d Faasnacht isch in däm Joor schampar frie:
Am elfte Hoornig, also frie wie fascht no nie.
Drum wände mer is jetz an alli Faasnachts-Frind:
Kaufet d Blaggedde flyssig, und vor allem gschwind.
Ganz anderscht als dr US-Immobilie-Määrt
sinn unseri Blaggedde ganz e feschte Wäärt.
Und s git en Uusgoob fir e jeedes Boortmenee.
In däm Sinn, danggscheen vylmool, s Fasnachts-Comité.