Unser Sujet
«Dytschi integriere und intrigiere!»
Unsere Sujet Värs
Mir saage Hoi, Bonjour und Ciao
Aber au Sali, Griezi und Hellau
All die frintlige und nätte Schwoobe
Dien unseri scheeni Stadt so loobe
Denn in d Schwyz koo schaffe und woone
Tuet sich fir sie finanziell sehr loone
Mir saage das jetz wiirgglig ooni Unterton
Haisse willkumme, jede ainzelne Teuton
Unseri zwai Länder mit Haupstedt vonenander so fäärn
E Bäär als Gmeinsamkeit, verbindet au Berlin mit Bäärn
Nume die laidi Styyrhinterziehig
Steert e weeneli die dytsch-schwyzer Beziehig
Doch sie kemme als Tourischte und Biezer in Strööme
Und dien in ihrem Flyss und Beschaideheit nit klööne
Mir dien denn die langsame, gmietlige Schwyzer usehängge
Ruck Zuck Zack Zack, wärde Dytschi uns Vertraue schängge
Doorum unser Sujet vo däm Joor: Dytschi integriere
Und dooderfiir uf unserem Waage mit ihne intrigiere!
D Schwyz, international, bald 17. Bundesland?
E Eidgenosseschaft bald in Schwoobe-Hand?
Denn es wäärde jetz Detlef, Horst und Rüdiger geboore
Heiri’s Kalb, Ueli, Peterli, als Nämme geen verloore
In Zuekunft griegsch denn kai Nuggi meh im Kinderspidaal
Derfiir e Schnuller vo dr Schwester Waltraud, kalt und schal
Und au Hochdytsch im Kindergaarte
Losst jo nüm länger uf sich waarte
Dytschi Weerter lerne mir jetzt mit dr Buechstaabe-Suppe
Sie fange nämlig au scho a in dr Vorschuel-Gruppe
In dr Hauptschuel git’s den Zensure, und keini Note
In dr grosse Pause kei Znyyni, sondern Butterbrote
Als Junge het d Lehr mitlerwyyle usdiehnt
Nei wird als Azubi s Gäld verdient
Militär isch vergässe, nei gosch in d «Schweizer Bundeswehr»
Und denn als Manager verdient me in dr Schwyz jo viel mehr
Neiy Nämme im kulinarische
Wärde bald sehr zum tragische
Fondue Chinoise, Riebli und Nisslisalaat no ufem Tisch
Nei lernsch, was Feuertopf, Karotten und Feldsalat isch
Mit em Noochwuggs e Bächer im Bruune Mutz go dringge
Muesch nei fir e Pils im Brauhaus de dytsche Källner wingge
Es wärde jetz Curry-Wurst, Berliner und Hamburger gässe
Faschtewaaie und Läggerli sin scho fascht ganz vergässe
Am Minschterbäärg zem Neijoor no e Hyppograss
Glyy um dä Dreizaggbrunne e Polonäse mit Biermass
Jetz kauft me in dr Migros, Coop und Denner no in Schaare
In Zuekunft fahrsch in Aldi, Karstadt und Lidl mit em Kaare
Denn: Au mir Baasler meege us em grosse Kanton die Dytsche
Fahre bald mit em Drämmli in Marktkauf und luege uf’s Budget
Mir Baasler dien die Stadt no momentan regiere
Und uf Baaseldytsch richtig fiirnäm kommuniziere
Doch bald wärde e baar Sache nei und umbennent
Wo me momentan nur vom Heere, us em Dytsche kennt
Denn bald hänn mir uf jedere Fläsche e Pfanddepot
Derfiir muesch di denn nimm mit Bebbi Segg umeschloo
Nach 500 Joor wird uns kai Mäss-Gschmagg mee verfiehre
Nei duet Vatertag, Oktoberfest und Kirmes z’Baasel regiere
Momentan liist me d Baz, 20 Minute und dr Blick am Morge
Aber bald muesch d «Baseler Morgenpost» und «Bild» bsorge
Unseri Swiss ghert jo scho zur Lufthansa
Und s Joggeli wird nei zur Mercedes-Arena
Novartis und Roche wird vo Bayer Kemyy kauft
Und au sofort in dää Freistaat Namme umtauft
Und bi dr Umbenennig vo Ciba in B.A.S.F.
Hesch bald im Gschäft e Schwoob als Chef
Dr Deutsche-Telekom-Tower, voorhäär dr hoochi Mässeturm
Vo Rimmelinsblatz in Rummelplatz, laufe Baasler aber sturm
Nei haisst’s uf dr Mittlere Brugg «Jochen’s Käppchen»
UBS und CS git’s fir die Dytschi Bangg zum Schnäppchen
Und im Rootliechtmilieu, s isch nume no e Froog vo dr Zyt
Nei uf d Glaibaasler Repperbahn z’go, hesch nimmi wyt
Aber fir Aromat und Stewi, e schwyzer Erfindig
Macht me nit graad e dytschi Bezaichnig usfindig
Mir fyyre jetz dritt Oggdoober und erscht Auguscht
Friehner nur Helvetia und dr Tell mit Armbruscht
Im Fäärnsee d Azaal Schwyzer Sänder isch klai und beschaide
Aber die riisigi Uuswaal an dytsche Kanäl tuet schnäll verlaide
Denn friehner Cabaret Rotstift, Läppli und Ruedi Walter
Kei Fäärnbedienig, nur am Bildschirm vorne ai Schalter
Hitte mit Mittermayer, Stefan Raab und Atze Schröder
Wird’s im Fäärnsee trotz riesiger Uuswaal immer öder
Doch d Schwyzer kopiere au Sändige us Dytschland
Bauer-sucht-Frau und Musicstar, Niveau mit weenig Verstand
Und au die hit bekannti BVB, erscht vor 60 Joor umbennent
Het me no friehner als «Basler Strassenbahnen» kennt
Joe Ackermaa, Bobo und Lilo Pulver dien Dytschland erfreue
Hitzfäld und Oeri, dien dr Kontaggt zu Baasel au nit scheue
Au d Faasnacht wird wohl nit verschoont
Wie die nei Route, am Aafang ungwoont
Mir wänn no «Moorgestraich-Vorwärts-Maarsch» heere
«Wolle mer se reilasse?» wurd Baasler doch e weeneli steere
Und Räppli kennt nur no dr Waggis ufem Faasnachts-Waage
Doch bald wäärde au mir Stimmungsflocken miesse saage
Raere Waggis hänn mir no bis zer Faasnacht 2008 ghaisse
E Umbenennig in «Ratschen-Jungs» tuet zämeschwaisse
D Faasnacht, mir wän sie zwaimool im Joor in dr Zuekunft
Aimool s Comité, s andere Mol am 11.11. vo ere Narrenzunft
Doch Fasching, Karneval, Bonbon und Apfelsine
Bezaichnige wo uns doch sehr fremd erschyyne
Vyyl Material wo mir wurde zwaimool useschmaisse
Wo aber no immer Dääfeli und Orangsche wurde haisse
Trotzdäm steen mir mit de Schwoobe zwaimmol y
Denn daile dien mir uns jo scho lang dr Bappe Rhy
Comité Sujet
Jetz simmer laggiert!
Dr Blaggedde Värs vom Fasnachts-Comité
Fir d Blagette, wo jetz am Graage
e jeedi und jeede sott draage,
het dr Kinschtler seer vyl iberleggt.
Er haisst Roger Sigrist, e Junge.
Sy Kunschtwärgg isch mee als nuur glunge:
Doo hämmer e Gliggsfall entdeggt.
Zeerscht gseet men uff dääre Blagette
die Laarve, wo gmoolt wäärde wette
und drunder dr Mooler, wo moolt.
Mit Bämsle und Gratze und Glääbe
bikemme die Gsichter jetz Lääbe,
und glyy wäärden alli scho ghoolt.
Fir dass aber nyt duet verheie,
im Fall s kunnt scho schiffe und schneie
und s Gsicht nit d Visage verliert
duet men alles no guet impregniere
bis d Laarve denn froo jubiliere:
S isch guet soo: JETZ SIMMER LAGGIERT!
Laggiert simmer alli, muesch wisse.
Laggiert haisst drum au: Mer sinn bschisse,
und daas hämmer s letscht Joor jo gspyyrt. W
as d Bangge und d Wirtschaft is bschäärt hänn,
d Babyyr, wo kai Santym me wäärt hänn,
und kain me, wo ebbis verstyyrt.
Doch daas, wo dr Wäärt no ka bhalte,
und s Portefeuille no poositiv gstalte,
isch s faasnächtlig Eedelmetall:
D Blagette muesch kaufe und sammle,
denn die wird uff kai Fall vergammle.
Und s Comité danggt jeedefall!