Unser Sujet
«Drotz Fynanz- und Wirtschaftsgryyse,
leen mir uns d Fasnacht nit vermyyse!»
Dr Waage
«Dr Unggle Säm duet s Gäld vernichte!»
Comité Sujet
«E rundi Sach!»
Dr Blaggedde Värs vom Fasnachts-Comité
Jetz, wo mer uff e groosse Runde aanestyyre
mit hundert Faasnachts-Joorgäng under Dach und Fach,
jetz wämmer bschaide, baaslerisch e bitzli fyyre,
denn immerhii sinn hundert Joor E RUNDI SACH!
Und d Feschtfraid wämmer au mit dr Blagette zaige:
mit dr Frau Faasnacht, wo uff iirem braite Huet
grad wien e Bluememaie unsere ganze Raige
vo Baasler Faasnachts-Naare presentiere duet.
Das Wärgg vom Pascal Kottmann gits wie gwoont in Kupfer,
in Silber, Gold und au als Bijou („Médaille d’Or“).
Es isch e ganz en elegante Ufftaggt-Dupfer
im Fasnachts-Comité sym Jubileeums-Joor.
Und wär d Blagette richtig bschaut, dä wird entdegge,
dass sich deert ganz im Egge in sym Naareglaid
dr 1911-er-Ueli duet verstegge,
die legendääri ”Noodle”, wie me z Baasel sait.
Jetz isch dä Ueli abgstaubt, gliftet, und mer dängge,
die Noodle gäbs als Souvenir no oobedryy
zem noo dr Faasnacht iber s Joor an Tschoope hängge.
E Juubeljoor lang Nostalgyy – das deerf doch syy!