Unser Sujet
«Drotz dr Wiirtschaft, no immer schyyter;
goot s uf Pump, aber mit Prunk so wyter!»
Comité Sujet
«Zämme fägts!»
Dr Blaggedde Värs vom Fasnachts-Comité
S pfyfft und drummlet, d Gugge schränze.
D Bängg dien mit de Pointe glänze.
D Fasnacht isch doch ebbis ganz perfägts
noonem Motto „zämme fägts“!
Im letschte Summer duet bi Rääge
ain gaischtig scho d Blaggedde prääge.
D Kinder sinn e bitz drgeege,
denn si wette Puzzle leege.
Dr Domo Löw sait sich, s isch digg,
d Blaggedde isch e Puzzle-Stigg!
S het e Tambour uf dr Kupfer,
silbrig setzt dr Waggis Tupfer.
D Gold-Blaggedde het kai Lugge.
Dert findsch d Bänggler mit de Gugge.
Die alti Dante bringt is eedel
uf em Bijou no dr Zeedel.
Das Joor kasch, de merggsches jetze,
die ganzi Fasnacht zämmesetze.
Dr Däni Müller het si prägt,
so guet, dass es zämme fägt!
Jedi anderscht, s isch e Ding,
das haisst hitte Marketing!
Lyt, wo jedes Sujet wette,
kaufe also vier Blaggedde.
Vier, dasch vyl. Ob Frau, ob Maa,
sott me sicher aini haa!
Zämme fägts so umso mee,
danggscheen sait eich s Comité.