Unser Sujet
«Drotz Sujet hän mir das Joor kaini Rögg,
e Raere Castle, wie allewyyl nur mit Bögg»
Unsere Sujet Värs
E Lugge wänn si in d Kasäärne schloo,
dermit me diräggt zem Ryy ka goo
Fir s Tattoo isch s kai gueti Sach,
dä Duurgang diräggt zem Bach
Dr Schott spiilt bald s letscht Lied uff dr Zinne,
und dänggt «Well, yes, die Baseler spinne»
Comité Sujet
«S glemmt!»
Dr Blaggedde Värs vom Fasnachts-Comité
S glemmt, dr Euro isch so tief,
in dr Wirtschaft goot z viil schief.
S glemmt bi däne Waale z Bärn
und in Basel saits kain gärn:
S het am Cortège zimlig glemmt,
drum isch s Comité bitz ghemmt.
S zaigt dä Riissverschluss symboolisch,
dass das Motto gar nit hool isch.
Glemmt er nit, dr Riissverschluss,
denn lauft d Fasnacht uus aim Guss.
D Guggemuusig fäädlet ii,
s pfiifft und drummlet vis-à-vis.
Naime faart e Schääse duure.
D Waggis hänn e groossi Schnuure.
Grad d Frau Fasnacht sait is au:
Ich kumm nimme, gits nur Stau.
S Junteressli gnaggt die Nuss
und ziet gschwind am Riissverschluss.
Lueg, hets Junteressli gsait,
Stau, das isch Vergangehait!
Kupfer, Silber, stegg si aa,
und de wirsch e Bijou haa.
Wottsch no mee, nimmsch d Goldblaggedde
mit dr Stadt als Silhouedde.
Ai, dä Kinschtler, saisch bim Gnaisse.
Är duet Roger Sigrist haisse.
Sii Entwurf hänn mir scho gnosse
und dr Müller het en gosse.
Duets zwor dusse mänggmool glemme,
sott di jetze niit me hemme.
Ab uf d Gass, verkauf ab hit.
Bim Verkauf haissts: Doo glemmts nit!
D Asprooch vo unserer Waage-Gotte
Erscht e Joor bini do drbi
E passiv Raere – das muesch sy
E steili Karriere hani könne mache
Dr Schämpis dörfi hüt lo krache
Mim Cousin hani das z verdanke
Dr Scheck nimi nochhär – in schwyzer Franke
Als erscht het är wieder d Schnurr ufgrisse
«I kenn do eini….» – es isch zum sch…. schreie
«Die macht das sicher, ganz easy locker»
wie letscht Mittwuch dr Vale Stocker
Doch zugg zu dämm wo-n-ich wett saage
S goht nit um mi – s goht um dä Waage
S Tattoo isch gfördet – i kas kum glaube
Das isch als wenn me euch die Rär würd raube
E Loch zmittst dure wänn sie bohre
S Tattoo wär dodrmit verlore
Verschlugge würd dr Bach die Tön
S wär nimmi s glych- s wär nimmi schön
E Zeiche setzt dä Waage do
Mir wänn das nit – scho gar nit so!
Die Kläng vo Drummle willi höre
E komisch Kauz wo das duet störe
Dä Schock mien mir no zerscht verdaue
Drum wird am Bummel nach Schottland abghaue
E tolli Reis wünsch ich und Spass
Und suffed Whisky vo dr Extraklass
Für d Fasnacht liebi Räre-Bögg
Dient wild und lut – halt ohni Rögg
Verteilet Räppli, Dääfi und Mimose
Das leider alles in schwarze Hose
Hät scho gärn chli Wädli gseh
Und……was isch drunter – würd jedi wunder neh!
Viel Arbet, Härzbluet und au Schweiss
Hän dir do dri gsteckt – e jede weiss
Uf sim Rugge duet är euch trage
Dä schöni stolzi Raere – Waage
Und nur e Bogg dörf obe stoh
Kei wiiblig Wäse isch zuegloh
Doch ohni d Ursi – ihr hättet Mieh
Miesste dir dä Charre zieh
Und eimol meh – wär hättis dänkt
Ischs e Frau wo alles länkt
So gnueg lang gredet, gschwaflet, dichtet
Jetzt isch dr Bligg uf d Fasnacht grichtet
Drei scheeni Dääg wünsch ich als Gotti
Am Cortège standi – e Bliemli wotti
No 17 Stund denn gohts scho los
Dr Puls stiegt a und d Freud isch gross
Uf d Fasnacht 12 wirsch du jetzt dauft
Dass alles wie am Schnierli lauft