Unser Sujet
«D Raere im olympische Schnee
Mit Staart-Hyysli und Châlet»
Stoosch wie mir sicher uff de Schyy,
denn sottsch in Sotschi derbyy gsi syy
vom vyyle speertle hänn mir diggi Waade,
e Resuldaat vo dr Winter-Olympiade
Im Staart-Hyysli steen mir baraad uff de Holzbrätter
im Goschdyym so viel schlangger und au nätter
Mir hänn aber nit nur uff e Winterspoort verdraut,
doorum hänn mir au no e haimeligs Châlet baut
Comité Sujet
«Gäll, blyb suuber»
Dr Blaggedde Värs vom Fasnachts-Comité
Gseesch dä Waggis mit de Sogge
uf em Ochsnerkiibel hogge
Är sitzt guet und isch uf Zagg
S giengt nit uf em Bebbisagg
Lueg dä Waggis duet is nutze
und dr Baslerstab no butze
Mit dr groosse Waggisschnuure
git er „gäll, blyb suuber“ duure.
Glaas, Bapyr hets als wie mee.
D Strooss kasch mängmool gar nimm gsee.
An der Huuswand duet ain Blinzle.
Dä duet nur nur Värsli brinzle
Aa hänn si en orange Gwändli
und si hänn ganz flinggi Händli.
Danggscheen saisch, denn gäbts eich nit,
wär die Stadt e Saustall hit.
Gäll, blyb suuber! Merggsches nooni?
Griegsch au du no z hoochi Booni?
Gäll, blyb suuber! Doo dänggsch nämli
Au an d Firma vo de Drämli.
Gäll, blyb suuber, haisst hit s Motto.
D BKB spiilt au gärn Lotto.
Duesch d Finanze gnau belychte,
mien si au in Lieschtel bychte.
Dänggsch no wyter mit bitz Grips,
noo machsch Fasnacht ooni Schwips.
Due di jo nit sunscht no blooge
D Fasnacht isch die stärggschti Drooge.
Grad dr Pascal Kottmaa lacht.
Är hets wirgglig suuber gmacht.
Gäll, blyb suuber, darfsch nur saage,
wenn du duesch d Blaggedde draage.
Gäll blyb suuber, saag i spitz,
aber mit Humor und Witz.