Unser Sujet
«Syt 50 Joor uff dr Gass»
Unsere Sujet Värs
Do hilft kai schnäädere und kai kääre,
Zer Stroosse-Fasnacht gheere d Raere!
Denn 50 Joor – das isch famoos,
Sin d Raere-Waggis uff dr Strooss!
Und mängge Junge maint – jetz phagg-ys,
Ych gang au zue de Raere Waggis!
«Und die ganzi Wält goht zugrund, nur d› Raere-Waggis bliiebe gsund!»
Anno 65 isch vom Haafebeggi II
e Walter nit so ganz ellai,
woo ums Verworge will brobiere,
in dr Stadt unschiniert go z intrigiere:
Vier Waggis und quatre Alsaciennes
geen als Rhyhaafe-Strytzi denn!
E Joor speeter gseesch die Strytzi kääre,
wie si an dr Fasnacht uff eme schwääre
groosse Waggiswaage wääre….
Jä, und dr Mouton duet erklääre:
«Mir kennten is doch uff däm lääre
Waage um e Riise-Rääre schääre!!»
1967 spränge d Raere-Waggis scho dr Raame,
aaber numme ganz bedingt für Daame.
Fahre losse, s Ursi, joo das kaa me,
als Raere-Waggis aaber gäbt das Drame,
Fraue wuurden eh jo gschwind erlahme(n):
Drum uff e Waage numme Männer – Amen!!
Jeedes Joor, soo kaa me wirgglig saage,
Isch aine mee uff em Raere-Waage…
D Sujets haisse: «Uffem Waage sinn sächs,
s näggscht Joor sibe dangg Aigegwächs,
1972 steen scho nyyn in d Raaie,
woo die mega Rääre draaie.
Aimool dien si Légumes verkaufe,
en ander Mool sich gaischtig verschlaufe
als Rezessivi in e Dino-Sau-Gärtli
zem e Schnäpsli, emänd e Zibärtli??
Vyyl mee git’s doo jetz nimm z erklääre,
d Hauptsach isch, si dien no immer rääre!!!
Comité Sujet
«Mer spränge dr Raame!»
Dr Blaggedde Värs vom Fasnachts-Comité
S Kunschtmuseum darf sich zaige
und d Frau Fasnacht sich vernaige
mit me Helge und em Raame
macht d Blaggedde soo Regglaame
Wie soll au e Raame länge
denn d Frau Fasnacht duet en spränge
D Harlekin mit vyl z vyl Pfuus
laufen iber d Kupfer uus
D Gugge schränze mit vyl Gwicht
bis dr silbrig Raame bricht
D Wäägeler hänns in dr Hand
gsprängt wird au dr goldig Rand
S Bijou sprängts au grad e bitz
D Schnitzelbänggler sinn so spitz
D Fasnacht blitzt do wirgglig duure
D Waggis hänn e frächi Schnuure
Scharfi Pointe bruuchts no mee
oder schimpft denn s Comit
Nai, dasch lätz, die schwarze Raabe
sinn jo au nit Waiseknaabe
Waisch, wiesoo du d Larve draisch
dass du alle alles saisch
Mach kai Booge me um Draame
Bebbi, spräng du soo dr Raame
Guet het das dr Müller gmacht
Die Blaggedde isch e Pracht
Alli vier sinn ganz verschiide
sait dr Guido Happle zfriide
Nimmsch du aini, heersch scho s Gschrei
Loos, dir fääle jetz no drei
S Fasnachts-Comité sait salli
Kaufet bitti daas Joor alli