Unser Sujet
«Mir gseen root!»
Unsere Sujet Värs
Eb dr Wessels richtig stoot, gseesch wenn s roote Liecht aagoot
Dr Hampe sait ze synere gliebte Frau,
Schatz, mir konschdruiere jetz e Stau
Är dänggt, das isch famoos, d Auti steen jetz uff dr Strooss
Root, nit grieh, dass isch s Brogramm, jetzt iiberholt di au no s Dram
Mir gseen iiberall root, es isch e Fluech,
gli stoosch biraits in Schönebuech
Als Autifahrer, gib guet acht, dass kein in di yyne gracht
Ziigig faare, das isch Gschicht, faarsch bi root, denn kunnsch vor Gricht
Dr Verkeersclub Schwyz, dä jubiliert,
z’Basel wirdsch im Auti scho kaschtriert
Und d Moraal vo däm Raim, am allerbeschte blybsch dehaim
Und kunnt kai Auti, s isch verruggt, geen d Lääde in däre Stadt kaputt
Unsere Vordraab:
S Drämli brämst is us!
Unsere Waage
Auti, wo im Stau steen!
Comité Sujet
«D Boscht goot ab!»
Dr Blaggedde Värs vom Fasnachts-Comité
D Boscht goot ab saisch du ganz froo.
Isch das wirgglig no esoo?
Schiggsch e Briefli A-Boscht ab,
machts grad iber Nacht scho schlapp.
Druurig gseet das Briefli root
und kunnt bald als B-Boscht z spoot.
Oft duet hit das Gschichtli stimme.
Also bruuchsch au d Hauptboscht nimme.
S Motto vo dr Boscht isch knapp
hitte nur no: D Boscht baut ab.
Dert in Seoul lauft d Prozeduur.
Jetz isch d Fasnacht Wältkultuur.
S SMS griegsch du in d Woonig,
denn per Boscht hättschs hitte noonig.
Und halt doch uf Schritt und Tritt
goot die Boscht no mit uns mit.
Klopft dy Härz, no goot nyt schief,
wenn de schiggsch e Liebesbrief.
Wie kaasch du dä Brief no toppe?
Mit dr Fasnachtsenveloppe.
Schängg dym Schatz drum die adrette
wunderbare Boscht-Blaggedde,
woon en Ueli pfyffe duet.
Au e Bajass drummlet guet.
Und e Harlekin fillt d Lugge.
Daas Joor spilt do au e Gugge.
S Couvert isch e Fasnachtstämpel
und s het no dr richtig Stämpel.
Kupfrig, silbrig kaaschs verschigge.
Gold und Bijou sinn die digge.
Ritze, gratze und au sääge.
Soo ka nur dr Müller prääge.
S Kunschtwärgg gmacht het d Clelia Zoller.
Isch ächt ai Blaggedde toller?
D Boscht goot ab, kaasch numme saage,
wenn de alli vier duesch draage.
Soo goot d Boscht ab und no mee
sait eich s Fasnachts-Comité.