S Restaurant Klybeck Casino. Unseri Stammbeiz sit em Herbscht 2010.
Do hän mir an jedem 2. Donnschtig im Monet unsere ordentlige Hogg. Ab Jänner träffe mir uns bis zum Morgestraich all 14 Daag. An dere «Denker-Stätte» finde vieli Diskussione statt, Entscheid wärde gfällt und sicher no mängi Idee und Visione für unsere Waage, d Larve und d Kostüm wärde entstoo. Do inne git’s au d Generalversammlig, d Blaggedde-Usgoob am erschte Samschtig im Januar und natürlig nach em Cortège jewyls e Nachtässe. Über unsere Köpf am Stammtisch hänggt unseri schöni Raere-Lampe.
D Alexandra und ihres Personal erwarte au Euch gärn im Restaurant!
Adrässe
Restaurant Klybeck Casino
Klybeckstr. 34
4057 Basel
Delifon 061 681 66 49
https://klybeckcasinobasel.ch
Am Afang sin mir bim Günthi in dr «Gieterhalle» in dr Mattestrooss 77 gsi. Denn sin mir 300 Meter züglet und vo 1997 bis Meerze 2010 hän mir denn bi dr Bea im Restaurant «Mulbeeri» in dr Mulbeerstrooss 2 dörfe yquartiert si! Denn isch die Beiz zuegange und mir hän e summerlige Zwüschehalt im «Rhyfälderhoof» in dr Hammerstrooss 61 gmacht! Syt Septämber 2010 sin mir im «Klybeck Casino», wo zerscht d Sevda gfiehrt het. Im Abrille 2019 het sie d Beiz dr Mara übergeh. Syt Dezämber 2022 wird s Lokal vo dr Alexandra gleitet!