Unser Sujet
«D Raere spiegle … Dr Spiegel … Di Gsicht …»
Unser Rädäbäng
Lueg emool dryy und lueg di aa,
jä im Spiegel kunnsch jetz draa
Wenn di no so vyyl matsch loobe,
dr Spiegel duet di gwiss nit loobe
Bisch du das am Stroosserand?
Wirdsch du zem greeschte Naar im Land
Zaigsch uff anderi mit de Finger,
dr Spiegel gseet di no vyyl schlimmer
Zie si yy dyni Pfoote,
jä deerfsch drei mol roote
S goot nit nummen um di, um himmels Wille,
nimm si ab die rosa Brille
Dr Spiegel isch wies Gsetzt fir alli glyych,
eb digg, dinn, doof oger ryych
Besser syy als alli andre, isch di Credo,
vertrau de Raere, paggs yy di Ego
Denn … uus Nätte, Liebe Flotte
wärde Duuble, Pflögg und Drottle
Lueg di aa, blyb bi dr Sach,
au du bisch und blybsch glai und schwach
D Raere spiegele, jä s intressiert is nit die Boone,
es syg denn, es hätt en Yfluss uff unseri Subvenzioone
Dr Värs vo dr Waage-Gotte an dr Dauffi
Ganz spontan wurde ich angefragt …
E glaine Witz, mit Hochdytsch dien mir sicher nyt starte.
Also nomol vo Aafang aa,
Söll jo schliesslig au Fleisch am Knooche ha.
Huch, e grosses Exgüsi an unseri Veganer,
S wird sälbschtverständly no urbaner.
Ganz spontan bini agfrogt worde,
Zum do z’stoh an däm scheene Morge.
Aber wurum standi denn hüt wirklig do?
Will d Raere bald tüen uf däm Waage stoh.
Au wenn i s’Baslerdytsch nid beherrsche due,
sötts doch länge für die Reed in aller Rueh.
Nid ganz so viel Zyt isch mr bliibe,
zum die Reed do vorne z’iiebe.
Erst vor paar Täg ischer cho, äs sig ä feine Zug – sogar ä flotte
Wär ig jetzt sini unumstösslichi Waagegotte
Dennoch isch mir e Ehr do vorne z stoh,
Danke Bieli Nico, i hau di drnoo.
Heschs nit gmerkt aber plötzlich bisch zmitzt drin
Jetzt saisch dr Frau Schugger au Schuggerin
Gschmagg Sach, jedem das Seine – ig verstand das scho,
Aber muess denn no überall äs Stärnli oder Diverses stoh
Äs gohnt no witer – ha gmeint ig gseh nit rächt
Gits neuerdings grad 72ig verschiedeni Gschlächt
Ig hoff dir hän Zyt- ig fang drum nomol ah
Die neui Begrüessig sells jo gendergrächt au in sich ha
Härzlig willkomme, liebi Raere Waggis*inne,
Familie*inne, Fründe*inne und sunscht no Glatti*inne.
Nomol: Härzlig willkomme, liebi Raere Waggis,
Familie, Fründe und sunscht no Glatti
Kennsch denn s Sujet, wenn nid, denn muesch jetzt loose:
D Raere spiegle … Dr Spiegel .. dis Gsicht
Das Joor wird e Spiegel vorghalte,
Au wenns neh nid passt, de Junge und Alte.
Dr Spiegel so gross wie e Waagis Waage,
Do chasch di effektiv nid beklagee.
Vo Zyt zu Zyt e Spiegel vorzhalte,
das bruchts eifach, bi de Junge wie Alte.
S Händy in dr Hand,
Pass uf, bevor de laufsch in e Wand.
Lueg di doch ah – bruchsch doch no meh?
Hesch di nonig gneug im Spiegel gseh?
Uf Insta und Tiktok – meh chönnts au dängge
sottsch nur no dä Schöne und Riiche Glaube schängge
Ä digge Charre, ä türi Uhr, ä grosses Fudi und ufgsprüzti Lippe
Und has nit vergässe, au ä huffe Silikon in dä beide… ~ Badzimmerfuege.
Aber nit verschregge – ig ha do no ä ruhige Maage.
Dene chönne mir no immer Stadt-Zürcher saage.
Refektiere, erkenne und dra schaffe,
Sunscht bliiebe mr eifach Gsellschafts-Affe.
Sage mrs mol soo: D Gsellschaft z spiegle in dene Zyte,
Isch wie, wenn d würdsch das Joor dr FCB Title.
Ach, lömer mol dr FCB stoh,
Dä hets das Joor sowiso gnoh.
Widme mr uns de wichtige Gschichte,
z.B. s Klima, do dien unsri Medie jo ab und zue chli briichte.
Jo schiins isch dä Klimawandel doo,
Gmäss de Medie duesch jetzt scho im Backofe stooh.
Us däm grund – mir hän uns fest müeh geh in unserer Wahl
Stoht dä WaAge do als knapp fascht ganz klimaneutral
S Klima rette chasch vrgässe,
genauso wie s Insekte frässe.
Zum s Klima rette bruchts chli meh,
vilicht mag dr Vas Narasimhas e glaine Zuestupf geh?
Ach, lömer die Theme, meh mags bald nüm ghöre.
Wichtig sind doch folgendi Sache: Gsundheit, Liebi, Familie und Fründe
Und eifach wiedermol luut lache.
I ha vrnoh, ä Raere Waggis wird bald goh.
Meinsch het er scho gnueg Vögel um sich im Zolli
und brucht är nümm no 10 anderi, nätti, schöniTolli?
Kumpels, wo ihn tüen löchere und frooge
Eb das mit dene Pin vom Zolli au chli sig glooge
Ischs ä Zuefall? Ich bi nit sicher – jä ich wais es nit
Sammlet er meinsch dä Stutz für sini Fasnachtspension grad au no mit.
Jänu sigs wies well – verruggt wär ihm keine
Si Raere Härz schloot für immer wyter wurdi meine.
Soodeli, es isch guet und gnueg.
Scho bald gohts loos, meh chas chum erwarte,
Die drey scheenschte Dääg dien starte.
Als Gotte dauff i dä Waage mit Härz und Seel
Scheeni Fasnacht zämme: Euri Rahe(e)l!
Und die ganzi Wält goht z’grund,
nur d Raere-Waggis bliiebe gsund.
Comité Sujet
«Vogelfrei»
Dr Blaggedde Värs vom Fasnachts-Comité
E Vogel pfyfft huhuu-guguus
Ych woon im neye Vogel-Huus
En Äffli gsellt sich no derzue
Und scho isch fertig mit dr Rue
Drumpeetend mechts no attäschtiere
Dr Zolli duet au jubiliere
En Ilp maint mächtig fir d Aggt
Bruuchts klar e satte Drummel-Taggt
E Pinguin pyypst jä gottsaidangg
Han ych jetz schon e Schnitzelbangg
Lutt brüllt e Lai s wär glaub e Sääge
Wenns Bhaltis gäbt wie vo de Wääge
S duet sich e Giraff no dryydrugge
Dr Taggt aagää dien denn au Gugge
Das Kääferfescht erinneret schyych
An en Aaloos – s isch dr Vrglyych
Zu unsrem Bruuchdum nit verkeert
Wenn d Fasnacht so dr Zolli eert
Drei Dääg isch d Alldaag-Gnoorzerei
Wyt wägg – mir sinn e bitz vogelfrei
Kai Chef, kai Sitzig und kuum Stryt
Nur yystoo sott me n als zer Zyt
S ney Vogelhuus und s Jubiläum
Het denn dr Guido Happle droum
Zem Aaloss gnoo d Blaggedde z moole
S het s Comité drno empfoole
Loos GUido s miecht in däm Fall Sinn
Du moolsch drzue grad no drei Pin
Denn zletschtamänd wurds sich scho loone
Wenn zwai Basler Institutioone
Jetz ändlig emool zämmesteen
Das isch doch aifach wunderscheen
Jä d Fasnacht und dr Basler Zolli
Do schängge mir doch s Glaas grad voll yy
Dr Lai brüllt lut no mit me Brüller
Bräggt het si denn dr Mike Müller
Seer lut wirds au wenn s vieri schloot
Und ändlig wider s Liecht abgoot
S wird dierisch, farbi und vyyl mee
Härzligscht – Fasnachts-Comité